FS-2023-17, Jiyè 2023 Sèvis Revni Entèn te anonse yon gwo chanjman nan politik li an Jiyè 2023 ki mete fen nan pifò vizit san anonse ofisye revni (ROs) ajans lan yo bay kontribyab yo pou diminye konfizyon piblik epi amelyore mezi sekirite jeneral pou kontribyab yo ak anplwaye yo. Chanjman sa a fè pati de yon pi gwo efò pou transfòme operasyon IRS yo apre pasaj Lwa sou Rediksyon Enflasyon ane pase a ak kreyasyon nouvo Plan Operasyon Estratejik IRS la nan mwa Avril. Olye pou yo fè yon vizit sou teren ki pa anonse oswa ki pa pwograme, RO yo ap voye yon lèt randevou pou pwograme yon premye reyinyon oswa yon swivi ak kontribyab la. Vizit san anonse ofisye revni yo ap fèt sèlman nan kèk sikonstans inik. Rès pwosesis koleksyon IRS la ap rete menm jan an epi li ap depann de kondisyon ak sikonstans dosye a. Enfòmasyon sou pwosesis koleksyon IRS la disponib sou Sijè No. 201, Pwosesis Koleksyon an (an anglè). Kisa yon ofisye revni ye? Ofisye revni IRS yo se anplwaye ajans sivil ki pa gen zam ki gen pou vizite nan kad yon pati nan travay yo, kay ak biznis yo pou ede kontribyab yo rezoud balans yo genyen sou kont yo. Travay yo se kolekte enpo ki anreta epi yo pa te peye IRS la ak pou sekirize deklarasyon enpo ki anreta nan men kontribyab yo. Aktyèlman IRS la gen anviwon 2,300 ofisye revni k ap travay sou dosye atravè peyi a. Ofisye revni yo edike kontribyab yo sou obligasyon yo pou yo ranpli ak peye enpo yo epi bay yo konsèy ak sèvis sou yon pakèt pwoblèm finansye pou ede kontribyab la rezoud pwoblèm fiskal li yo. Yo asire yo tou kontribyab yo konnen dwa yo selon lalwa epi yo ba yo bon jan kalite sèvis kliyan. Kijan ofisye revni yo travay Ofisye revni yo fè entèvyou sou randevou ak kontribyab yo ak/oswa reprezantan yo fas a fas oswa pa telefòn si sa apwopriye. Sa fèt nan kad pwosesis pou kolekte enpo ki anreta yo epi pou pran deklarasyon enpo anreta yo. Atravè entèvyou ak rechèch yo, RO yo jwenn epi analize enfòmasyon finansye yo pou detèmine kapasite kontribyab la pou peye bòdwo enpo yo. Kontribyab yo ta ka moun oswa biznis. RO yo konsidere lòt mwayen pou rezoud pwoblèm dèt fiskal yo lè kontribyab la pa ka peye dèt la nèt epi bay kontribyab yo resous ki ka ede yo, tankou: Aranje akò pèman ki pèmèt kontribyab la peye bòdwo a pa tranch. Lè sa apwopriye, akòde alèjman nan penalite ki enpoze yo lè bòdwo enpo a anreta. Mete koleksyon kont yo sou poz akòz difikilte finansye. IRS la fè tout tantativ pou jwenn yon akò ak kontribyab la, lè sa pa posib, yo ka pran lòt aksyon ranfòsman. Gen plis enfòmasyon sou pwosesis koleksyon IRS la ki disponib sou Sijè No. 201, Pwosesis Koleksyon an (an anglè). Diferans ant ofisye revni yo ak lòt ofisyèl IRS yo IRS la gen plizyè pozisyon ki ta ka parèt idantik pou piblik la, men yo gen anpil diferans, travay enpòtan pou kominike avèk kontribyab yo. Anplis de ofisye revni yo, gen ajan revni yo ak ajan espesyal pou Ankèt Kriminèl IRS tou ki ta ka rankontre ak kontribyab yo lakay yo oswa nan biznis yo men pou diferan rezon. Ajan revni yo se anplwaye ajans sivil ki pa gen zam ki se oditè konpetan ki anjeneral fè odit an pèsòn sou teren. Yo òganize sa yo nòmalman kay kontribyab la, kote li fè aktivite biznis li oswa nan biwo kontab kote liv ak dosye finansye òganizasyon an ye. Ajan revni yo pral fè kontak pa lapòs oswa nan telefòn anvan nenpòt vizit, eksepte nan kèk sikonstans inik, espesifik. Ajan espesyal IRS-Envestigasyon Kriminèl yo se ajan federal ki la pou fè respekte lalwa epi se sèl yo ki otorize pou mennen ankèt sou yon vyolasyon kriminèl posib nan Kòd Revni Entèn nasyon nou an ak krim finansye ki lye yo. Yo pa travay sou dosye fiskal sivil epi yo fè pati de divizyon Ankèt Kriminèl IRS la, oswa IRS-CI. Jiridiksyon envestigasyon IRS-CI a gen ladann fiskalite, blanchiman lajan ak Lwa sou Sekrè Bankè. Akòz ekspètiz ki nesesè pou mennen ankèt finansye konplèks sa yo, yo konsidere ajan espesyal IRS yo kòm premye envestigatè finansye pou gouvènman federal la. Gen anviwon 2,100 Ajan Espesyal IRS-CI nan Etazini ak aletranje. Konfime si se IRS la Ofisye revni yo ak ajan revni yo pa gen zam epi yo pote de fòm idantifikasyon ofisyèl ki gen yon nimewo seri ak foto yo. Kontribyab yo gen dwa pou yo wè tout indantifikasyon sa yo epi yo ka mande yon lòt metòd pou verifye idantifikasyon yo a. Sonje byen, kontribyab yo ta dwe konnen ke yo gen yon pwoblèm fiskal anvan vizit sa yo fèt etandone te gen plizyè mesaj ki voye. Ajan espesyal IRS-CI yo se sèl pèsonèl IRS ki gen zam epi yo toujou prezante idantifikasyon polisye yo lè y ap mennen ankèt. Ou ka jwenn plis enfòmasyon sou kijan pou idantifye reprezantan lejitim IRS yo ak sou fason pou rapòte eskwokri yo (an anglè) nan IRS.gov.
